تاند(یکشنبه، د ثور۲۶) افغان امنیتي ځواکونو د میدان وردک ولایت په جغتو ولسوالي کې یو اوږد تونل موندلی او وايي چې دا تونل طالبانو د «تروریستي» مقاصدو لپاره جوړ کړی و.
د افغانستان دفاع وزارت نن د دغه تونل عکسونه له رسنیو سره شریک کړل او ویې ویل چې طالبانو دا اوږد تونل د دې لپاره کیندلی و چې د هغه له لارې حکومتي ادارو او امنیتي پوستو ته ځان ورسوي.
دفاع وزارت نه دي ویلي چې د تونل اوږدوالی څومره دی او د جغتو ولسوالۍ په کومه سیمه کې یې کشف کړی دی.
طالبانو هم د دفاع وزارت د دې ادعا په اړه تراوسه څه نه دي ویلي.
تر دې وړاندې هم طالبانو په ځلونو تونلونه د خپلو بندیانو د خلاصون او بریدونو لپاره کیندلي دي.
تېره اوونۍ طالبانو په بغلان ولایت کې د یوه تونل یا سمڅې له کیندولو وروسته په پوسته کې مېشت سرتېري وژلي وو.