تاند ( یک شنبه، د ثور ۲۶مه) د بشري حقونو نړیوالې ادارې د اسراییلو او فلسطین ترمنځ د تاوتریخوالي پر درېدو ټینګار کړی دی.
په جینوا کې د بشري حقونو نړیوالې ادارې په یوه خبرپاڼه کې ویلي، چې ځینې لوري د اسراییلو او فلسطین ترمنځ د ناندریو د کمولو پر ځای د جګړې د زیاتوالي هڅه کوي او نړیوالو ته په کار ده، چې له پاروونکو اقداماتو ډډه وکړي.
د بشري حقونو نړیوال سازمان ویلي، چې ژر تر ژره دې دواړه لوري تاوتریخوالی کم کړي او جګړه دې ودروي.
بل لورته د اسراییلو لومړي وزیر بیا پر فلسطین د هوايي بریدونو پر دوام ټینګار کړی دی.
هغه ویلي، چې د فلسطیني توغندیو په غبرګون کې به یې هوایي برید دوام کوي.
له تېرې یوې اونۍ راهیسې د اسراییلو او فلسطین ترمنځ سختې نښتې پيل شوي چې لاهم دوام لري.
د راپورونو له مخې ګڼ مصري امبولانسونه غزې ته تللي دي او هڅه کوي د جګړې ټپیان مصر ته ولېږدوي.
مصري چارواکو ویلي، چې د اختر په ورځو کې یې هم روغتیايي ټیمونو د فلسطیني ټپیانو د درملنې لپاره کار کاوه.
له دې ورهاخوا د نړۍ د ګڼو هېوادونو په پلازمینو او لویو ښارونو کې د فلسطینیانو په ملاتړ سخت لاریونونه پيل شوي او لاریون کوونکي له نړیوالو غواړي، چې له فلسطیني وګړو سره دې د اسراییلو ظلم ته د پای ټکی کېږدي.
تازه د راپورونو له مخې پر فلسطین د اسراییلو هوايي بریدونو تېره ورځ هم دوام کړی دی او پرون یې پر هغه ودانۍ برید کړی چې د الجزیرې او اسوشټېډ پرېس په ګډون د ګڼو رسنیو دفترونه پکې وو.
په دې برید کې چا ته ځاني زیان نه دی اوښتی خو ودانۍ نړېدلې ده.
د یادونې ده، چې د امریکا ځانګړی استازی په سیمه کې دی او هڅه کوي د دواړو لورو له مشرانو سره وګوري.
د امریکا ولسمشر جو بایډن هم اسراییلي او فلسطیني مشرانو ته په یوه تلیفوني مکالمه کې د بېړني اوربند سپارښتنه کړې ده.