تاند (سه شنبه د ثور ۲۱) د افغانستان د برېښنا شرکت وایي چې له ازبکستان څخه افغانستان ته د ۳۱۰ میګاواټه وارداتي برېښنا مزي بېرته له کابل سره وصل شول.
د برېښنا شرکت نن سه شنبه/ د ثور ۲۱/ په یوه خبرپاڼه کې ویلي چې د دې شرکت کارکوونکي په دې بریالي شول چې د وارداتي برېښنا یوه پایه ترمیم او په موقتي توګه د کابل د برېښنا مزي وصل کړي.
په خبرپاڼه کې راغلي چې د دویمې پایې د جوړولو چارې هم روانې دي.
د برېښنا شرکت د معلوماتو له مخې په دې سره کابل ته د وارداتي برېښنا د وصل اتیا سلنه چارې بشپړې شوې او ټاکل شوې چې په نږدې ورځو کې پاتې کارونه هم بشپړ شي.
د تېرې جمعې په سهار د کابل د کلکان او میربچه کوټ ولسوالیو تر منځ له ازبکستان څخه افغانستان ته د راغلې برېښنا دوه پایې په بمونو الوځول شوې وې.
د افغانستان برښنا شرکت د جمعې په ورځ وویل چې ناڅرګندو کسانو د کابل ولایت په کلکان ولسوالۍ کې د وارداتي برښنا دوو پایو ته چاودنې ورکړې دي.
د دغه دوو پایو په ویجاړېدو سره د کابل په ګډون ځینو نورو ولایتونو ته د ازبکستان د ۲۲۰ کیلو ولت برښنا جریان پرې شوی و.
که څه هم تر دا مهاله د دغه پایو د تخریبولو مسؤلیت کومې وسله والې ډلې نه دی منلی. خو تر دې مخکې افغان چارواکو په یاده سیمه کې د برښنا پایو د تخریب په تور د ځينو کسانو د نیول کېدو خبر ورکړی و.
د افغانستان برېښنا شرکت له ازبکستان نه ۴۶۰ میګاواټه برېښنا اخلي چې ۳۰۰ میګاواټه یې یوازې د کابل لپاره ځانګړې شوې ده.