تاند(سې شنبه، د ثور۲۱) چین تور لګوي چې له افغانستانه د امریکايي پوځیانو د وتلو ناببره اعلان په دې هیواد کې د وینې بهېدا د زیاتېدا سبب شوې ده.
د چین د باندنیو چارو وزارت ویندویې وویل، له افغانستانه د امریکايي پوځیانو د وتلو اعلان په دې هیواد کې امنیتي وضعیت لا خراب کړی، سولې او ثبات ته یې خطر پېښ کړی او د افغانانو ژوند یې له جدي کواښ سره مخامخ کړی دی.
د سوت چاینا مارنینګ پوسټ ورځپاڼې د راپور له مخې، د چین د بهرنیو چارو وزارت ویاندې هواچونینګ (Hua Chunying) وویل، چین ته د افغانستان وروستیو خونړیو بریدونو ټکان ورکړی او پرې ژور خوابدی شوی دی.
دې د امریکا له متحدو ایالتونو وغوښتل چې له افغانستانه خپل پوځیان په مسوولانه ډول وباسي.
«پکار ده چې وویل شي، له افغانستانه د ځواکونو د بشپړه ایستلو په اړه د امریکا وروستي ناببره اعلان په درست افغانستان کې د حملو او چاودنو له زیاتېدو سره مرسته کړې، امنیتي حالت یې خراب کړی او سوله او ثبات او همداراز د افغانانو ژوند یې له ګواښ سره مخامخ کړی دی.»
تر دې وړاندې د چین پوځ هم له افغانستانه د امریکايي پوځیانو پر وتلو د انتقاد په ترڅ کې لیکلي و «امریکا خپله جګړه پای ته رسوي خو د افغانانو جنګ پر خپل حال پرېږدي.»
د چین پوځ: امریکا خپله جګړه پای ته رسوي خو د افغانانو جنګ په خپل حال پرېږدي
د ډېرو افغانانو په باور د ۲۰۲۰ کال د فبرورۍ په ۲۹ د امریکا او طالبانو له موافقې وروسته او بیا په ځانګړي ډول د افغانانو ترمنځ د تېر کال د سپټمبر په نیمايي کې د سولې د خبرو له پیلېدو وروسته په افغانستان کې جګړه زیاته شوې خو وروسته له دې چې د اپریل په ۱۴ ولسمشر جو بایډن اعلان وکړ چې درست امریکايي پوځیان له افغانستانه د سپټمبر تر یوولسمې پورې باسي، طالبانو د سیمو د لاندې کولو په هدف په هلمند، غزني، بدخشان، بغلان او ځینو نورو ولایتونو کې پراخې حملې پیل کړې.
طالبان که څه هم وتوانېدل چې په بغلان کې د بورکې ولسوالۍ په ګډون ځینې سیمې ونیسي خو په نورو ولایتونو په تېره بیا هلمند کې سختې مرګ ژوبلې ورواوښتې.
په لوګر او د کابل په دشت برچي کې دوې وروستۍ حملې، چې باور کېږي لومړۍ طالبانو او دوهمه داعش کړې، ډېرې خونړۍ او بې رحمانه وې.