تاند ( سې شنبه، د ثور ۲۱) د افغان سولې لپاره د امریکا د بهرنیو چارو وزارت ځانګړي استازي، زلمي خلیلزاد د افغان حکومت او طالبانو له لوري د اختر په درناوي د درې ورځني اوربند له اعلانه هرکلی وکړ.
نوموړي پر خپل ټوېټر لیکلي چې افغانانو د روان تاوتریخوالي له کبله لوړه بیه پرې کړې او په ورستیو اونیو کې ډېرې بدې پېښې وشوې.
خلیلزاد زیاته کړې، افغانان د سیاسي جوړ جاړي، دایمي اوربند مستحق دي او باید دایمي اوربند ته زمینه برابره شي.
هغه د سولې خبرو د ګړندۍ کېدو او د روانې جګړې د پای ته رسېدو غوښتنه کړې ده او په وینا یې افغانان د سولې هیله لري چې په دې برخه کې امریکا د دوی ملاتړ کوي.
دده په خبره سره له دې چې د درې ورځني اوربند هرکلی کوي، خو افغانان دایمي اوربند غواړي او ښکېلې خواوې باید د خپل ولس غږ واوري.
هغه د تاوتریخوالي پر کمېدو ټینګار کړی او یو ځل بیا یې ویلي چې افغان جګړه نظامي حل نه لري او ښکېلې خواوې باید د خبرو له لارې ددغه جګړې د ختمولو لپاره هڅه وکړي.
دا په داسې حال کې ده چې جمهور رییس غني تېره ورځ د پاکستان له لوی درستیز جنرال قمر جاوېد باجوه سره په خبرو کې ویلي، د افغانستان جګړه نظامي حل لار نه لري.
هغه دغه راز زیاته کړې چې د طالبانو ټینګار پر پوځي حل لارې افغانانو ته د منلو نه دی، افغان ولس د بحث او مذاکراتو له لارې د عادلانه او تلپاتې سولې غوښتونکی دی.
د یادونې وړ ده چې افغان حکومت او طالبانو د اختر په درناوي دري ورځنی اوبند اعلان کړی، خو افغان ولس له دواړو خواوو غواړي چې دایمي اوربند وکړي او خبرې پیل کړي.