تاند ( یک شنبه، د ثور ۱۹مه) د پښتون ژغورنې غورځنګ مشر منظور پښتین د کابل په دشت برچي سیمه کې د تېرې ورځې چاودنې چې، له امله یې ګڼو ملکي خلکو ته مرګ ژوبله واوښته غندلې.
پښتین ویلي، د کابل دشت برچې کې د تېرې ورځې چاودنې د افغانستان پر روښانه راتلونکي برید دی.
بل لورته په کابل کې د امریکا، جاپان، برتانيې، چین سفارتونو هم یاد برید غندلی.
دغه راز د پاکستان او ایران د بهرنیو چارو وزارتونو هم د کابل ښار د تېر مازديګر برید غندلی او د تاوتريخوالي پای ته رسېدو غوښتنه یې کړې.
د امریکا د بهرنیو چارو وزارت هم د کابل ښار دشت برچي سیمه کې د ښوونځي مخې ته چاودنې چې، له مله یې لسګونو کسانو ته مرګ ژوبله واوښته غندلې ده.
یاد وزارت ویلي: «کابل ښار کې د تېرې ورځې چاودنې چې، له امله یې ګڼو ملکي خلکو ته مرګ ژوبله واوښته، په کلکو ټکو غندو او په عاجله توګه د داسې وحشیانه بریدونو د پای ته رسېدو غوښتنه کوو.»
تېر مازدیګر د کابل ښار په دیارلسمه حوزه کې یوه دولتي ښوونځي ته څېرمه درې پرله پسې چاودنې وشوې.
د وروستیو معلوماتو له مخې د کورنیو چارو وزارت وايي، چې د کابل ښار دشت برچي سیمه کې د تېرې ورځې په چاودنو کې د مړو شویو کسانو شمېر ۵۵ تنو ته پورته شو.
یاد وزارت زیاتوي، چې دغه راز په یادو چاودنو کې له سلو ډېر کسان ټپيان شوي هم دي.