تاند ( یک شنبه، د ثور ۱۹مه) کورنیو چارو وزارت وايي، چې د کابل ښار دشت برچي سیمه کې د تېرې ورځې په چاودنو کې د مړو شویو کسانو شمېر ۵۵ تنو ته پورته شو.
یاد وزارت زیاتوي، چې د یادو چاودنو له امله تر سلو زیات کسان ټپیان شوي هم دي.
په ورته مهال د عامې روغتیا وزارت هم وایي، چې په کابل کې د تېرې ورځې په چاودنو کې د مړو شمېر تر ۵۰ پورته او دغه راز له سلو ډېر ټپيان شوي دي.
تېر مازدیګر د کابل ښار په دیارلسمه حوزه کې یوه دولتي ښوونځي ته څېرمه درې پرله پسې چاودنې وشوې.
د سرچینو د معلوماتو له مخې د تېرې ورځې په دې چاودنو کې ډېری قربانیان زده کوونکي دي.
یادې پېښې په هېواد دننه او د باندې توند غبرګونونه راپارولي دي.
افغان ولسمشر د دې چاودنې مسوولین وسله وال طالبان بولي خو وسله والو طالبانو د کابل د تېرې ورځې برید کې لاس لرل رد کړي دي.
تر اوسه د دغه پېښې مسوولیت چا نه دی منلی.