تاند(دوشنبه، د ثور۱۳) د افغانستان د سولې لپاره د امریکا ځانګړی استازی زلمی خلیلزاد نن کابل ته راغی.
خلیلزاد په وروستیو کې قطر، ازبکستان او تاجکستان ته سفرونه وکړل چې د افغانستان د سولې په اړه د اجماع له رامنځته کولو سره مرسته وکړي.
ده پرون په تاجکستان کې د روسیې، پاکستان او چین له استازو سره هم ولیدل او له تور لیست څخه یې د طالب مشرانو د نومونو د ایستلو ملاتړ وکړ.
ټاکل شوې ده چې خلیلزاد د افغانستان له ولسمشر او د سولې د ملي پخلاینې د عالي شورا له مشرانو سره وویني.
دا له کله چې له افغانستانه د پاتې امریکايي پوځیانو د وتلو رسمي بهیر پیل شوی، افغانستان ته د خلیلزاد لومړی سفر دی.
ده په قطر کې طالب مشران یو وار بیا د سولې خبرو ته وهڅول خو څرګنده نه ده چې د طالبانو غبرګون څه و.
دې ډلې تېره میاشت وویل، تر څو چې ټول بهرني پوځیان وتلي نه وي د سولې خبرې نه کوي.