تاند (یکشنبه، ثور ۵مه) راپورنه وايي، د عراق په پلازمېنه بغداد کې تېره شپه سهار ناوخته په هغه روغتون کې اور لګېدنه رامنځته شوه، چې د کورونا د ناروغانو لپاره ځانګړی شوی و.
د لومړنیو مالوماتو له مخې، اورلګېدنه په روغتون کې د اکسیجن د ډبو د چاودلو له امله رامنځته شوې ده.
پر ټولنیزو رسنیو خپرو شوو ويډیوګانو کې لیدل کیږي، چې د اور وژنې ډله د اور وژلو هڅه کوي او خلک له روغتون څخه د تېښتې په حال کې دي.
په بغداد کې د ملکي دفاع برخې مشر ډګروال کاظم بوهان حکومتي رسنیو ته ویلي، له ۱۲۰ کسانو ۹۰ ناروغان او د هغوی پایوازنان ژغورل شوي دي.
د کاظم بوهان په خبره، د اور وژنې ډله نن سهار مهال وتوانېده، چې اور کابو کړي، خو لا تر اوسه روغتیا وزارت د وژل شویو او ټپیانو دقیقه شمېره نه ده اعلان کړې.