تاند (یکشنبه د ثور ۵مه) د امریکا پخواني لوړپوړي ديپلومات، له افغانستان څخه د سرتېرو د ویستلو په تړاو د جو بایډن پرېکړه ستایلې ده.
د امریکا د بهرنیو چارو پخواني جمهوريپال وزیر جیمز بیکر، په خپلو تازه څرګندونو کې ویلي چې له افغانستان څخه د سرتېرو د ویستلو پرېکړه یو زړه ور اقدام دی.
د بیکر په خبره افغانستان د ټولو بهرنیو سرتېرو لپاره یو خطرناک هېواد دی او څومره ژر چې له دغه هېواد امریکايي عسکر وځي د امریکا په ګټه دي.
بیکر وایي دغه هېواد په وچه کې حصار دی، پېچلې لارې او درې لري او هوښیاران له دغه هېواد سره کار نه لري.
نوموړي د سرتېرو د ایستلو په اړه د بايډن پرېکړه ستایلې او هغه یې له زړه ورتیا ډک اقدام بللی دی.
بل لور ته بیا امریکايي شنونکي او د افغانستان د مسایلو څارونکي وایي چې د افغانستان پر ګاونډیو باور نه دی په کار.
مایکل روبین چې د افغانستان په اړه لیکنې کوي او دلته وضعیت څاري ویلي یې دي، که بهرني ځواکونه له افغانستان څخه وځي نو د دغه هېواد ګاونډیان به هلته مداخله وکړي او د جګړو د شدت سبب به شي.
هغه همدا راز ویلي، چې طالبان د سولې په برخه کې رښتیني نه دي، له همدې امله په هره وړه بهانه د مذاکراتو له مېز تښتي او شرایط وړاندې کوي.
د امریکا ولسمشر جو بایډن شاوخوا دوه اونۍ وړاندې له افغانستان څخه د امریکايي او ناټو ځواکونو د وتلو نېټه اعلان کړه، چې د روان میلادي کال د سپټمبر تر یولسمې نېټې به له افغانستان څخه وځي.