تاند ( یکشنبه، د غویی ۵) راپورونه وایي، د سعودي عربستان په جده ښار کې د یو رواني ناروغ له خېټې څخه د بریالي عملیات په ترڅ کې ډاکټرانو ۲۳۰ میخونه او ښېښې ویستي دي.
د راپورونو له مخې، ناروغ جدي و نو ډاکټرانو یې هم سمدستي عملیات کړی چې په ترڅ کې یې د دې ناروغ له خېټې ۲۳۰ میخونه او ښېښو مختلفې ټوټې ویستي دي.
د سعودي عربستان د روغتیا وزارت هم دا پېښه تایید کړې ده.
د دې هېواد د روغتیا وزارت زیاته کړې چې یو رواني ناروغ د درملنې لپاره د جده په نوم روغتون ته وړل شوی و چې اوس په ټپي حالت کې روغتون کې بستر دی.
راپورونه دغه راز وایي، د طبي معاینې وروسته ، ډاکټران هم دې چارې ته حیران شوي چې د نوموړي په معده کې څنګه بې شمیره میخونه او د ښېښو ټوټې پاتې دي.
راپورونه کاږي چې د ناروغ وضعیت په لیدو ، ډاکټرانو پریکړه وکړه چې په سمدستي ډول دې عملیات وکړي.
د معلوماتو له مخې، ډاکټران له یوه اوږده عملیات وروسته په دې توانیدلي چې د هغه له خېټې ۲۳۰ میخونه او د ښېښو ټوټې وباسي.
ډاکټرانو دا هم ویلي چې اوس مهال د ناروغ وضیعت د ډاډ وړ دی.