تاند (شنبه د ثور ۴) د افغانستان د ملي امنيت شورا وايي، د دوی په وړانديز او د ولسمشر اشرف غني د حکم په اساس، اووه تنه د امنيت شورا په بېلابېلو څوکيو تازه وټاکل شول.
د دې شورا له لوري په خپره شوې خبرپاڼه کې راغلي چې په دغو کسانو کې محمد رفيع فاضل چې تر دې مخکې لوی سلاکار و، د امنيت شورا د تخنيکي مرستيال په توګه وټاکل شو.
د امنيت شورا مخکېنی تخنيکي مرستيال عبادالله عباد بيا د امنيت شورا د لومړي مرستيال په توګه ټاکل شوی دی.
د خبرپاڼې له مخې، پاسوال عبدالمقيم رحيمزی د امنيت شورا د دفتر رييس او هارون رشيد شېرزاد د امنيت شورا د اقتصادي امنيت رييس شوی دی.
په دې سربېره، مهدي طهه د امنيت شورا د دفتر د دارالانشا رييس او محمد داوود انوري د سرمفتيش پر څوکۍ ګمارل شوي دي.
اووم تن محمد حميد طهماسي دی چې د زندانو د چارو د ادارې د رييس په توګه ټاکل شوی دی.