تاند (پنجشنبه د ثور ۲) د افغانستان لپاره د ملګرو ملتونو ځانګړې استازې دیبرا لاینز په دوحه کې له افغان لوریو او نړیوالو همکارانو سره د بین الافغاني مذاکراتو د پیاوړتیا لپاره د یوې مناسبې لارې پر موندلو سلا مشورې کړي.
یوناما نن پنجشنبه/د ثور ۲/ په یوه بیان کې ویلي، په دې خبرو کې ټینګار وشو چې د افغان سولې خبرو اترو د ملاتړ په تړاو به هیڅ ډول ځنډ نه رامنځ ته کیږي.
په بیان کې راغلي چې ملګري ملتونه به د افغان دولت او طالبانو له استازو سره خپلې ښکیلتیا ته دوام ورکړي، تر څو د سولې پر هڅو او یو تلپاتې او عادلانه ټیکاو خپل تمرکز وساتلی شي.
سرچینه کاږي چې د استانبول کنفرانس ځنډیدو افغان غاړو ته یو بل فرصت برابر کړ چې د دوحې په روانو خبرو اترو کې پرمختګ وښيي او د سولې د ټینګښت برخه کې روانې هڅې باید هېڅکله ټکنۍ نه شي.
یوناما زیاتوي، « د ملګرو ملتونو بې پرې توب او امکانات د افغانانو او د سولې په برخه کې د بوختو نړیوالو فعالینو په ځانګړي توګه د سیمې د هیوادونو په اختیار کې دي.»
د یوناما له لوري په خپاره شوي بیان کې دغه راز یاته شوې چې دغه بنسټ به له افغان مېرمنو، ځوانانو، رسنیو، د جګړې له قربانیانو او مدني ټولنو سره خپلو ناستو ته دوام ورکړي، تر څو د یوې ټول شموله سولې د رامنځ ته کېدو په برخه کې د دوی ملاتړ وشي.