تاند ( پنج شنبه، د حمل ۲۶) د جو بایډن پر وروستۍ پرېکړه روسیې هم غبرګون ښودلی.
د روسیې د بهرنیو چارو وزارت ویلي، د دوحې له هوکړې سره سم باید امریکایي ځواکونه تر مې میاشتې له افغانستان وتلي وای، خو دا چې امریکایي ځواکونه به په سپټمبر کې له افغانستان وځي د دوحې له هوکړې ښکاره سرغړونه ده.
روسي چارواکو ویلي دا چې امریکا د دوحې هوکړه نقض کړې د دې احتمال شته، چې په افغانستان کې جګړه نور هم زور واخلي.
روسیې تر دې وړاندې هم ټینګار کړی و، چې امریکایي ځواکونه دې د مې تر لومړۍ نېټې له افغانستان ووځي.
له افغانستانه د بهرنیو ځواکونو د وتلو پرېکړې ته د افغان چارواکو غبرګونونه
بل لورته بیا په افغانستان کې د کاناډا پخوانی سفیر الکساندر په ټوېټ پیغامونو کې ویلي، چې په افغانستان کې د جګړې اصلي لامل د بهرنیو ځواکونو حضور نه بلکې د پاکستان نیابتي جګړه ده.
هغه ویلي د سرتېرو شتون یا نشتون په افغانستان کې هېڅ اغېز نه لري تر هغه چې پر پاکستان د نیابتي جګړې د ختمولو فشارونه ډېر نه شي.
الکساندر تر دې وړاندې هم ویلي چې د پاکستان استخباراتي اداره یا ای ایس ای په افغانستان کې د جګړې تر شا ده او هڅه کوي د سولې روانه پروسه ناکامه کړي.
هغه ټینګار کړی چې نړیوال باید پر پاکستان د نیابتي جګړو د پای ته رسولو او ترهګرو د ملاتړ په خاطر فشارونه ډېر کړي.
بایډن: هغه وخت راغلی، چې ځواکونه یې د تاریخ له اوږدې جګړې خپل کور ته راشي