تاند- په بریتانیا کې د طبي علومو څېړونکي توانېدلي چې د مازغو د سرطان د درملنې په برخه کې مهم پرمختګ وکړي.
دوی وايي، د مازغو د سرطان د درملنې لپاره یې یوه نوې طریقه ازمویلې چې پایلې یې خورا هیله بخښونکې دي.
د مازغو سرطان یو له ډېرو وژونکو سرطانونو څخه دی چې درملنه یې خورا سخته ده.
ډاکترانو د لندن په رایل مرسډن روغتون کې پر دوو تنو، چې په مازغو کې یې سرطاني دانه یا تومور درلود له نوې طریقې څخه، چې د بیوکیمي (بایوکیمیکل) او ایمونوتراپي درملو ترکیب و، کار واخیست او مثبته نتیجه یې ترلاسه کړه.
دوی وايي چې د دې طریقې له کارولو وروسته د یوه ناروغ د مازغو تومور بیخي ختم شوی دی.
څېړونکي وايي، لا هم د دوی څېړنې په ابتدايي پړاو کې دي خو د مازغو د سرطان د درملنې لپاره یې هیلې تر بل هر وخت زیاتې غوړېدلې دي.
هغه ناروغ، چې د مازغو تومور یې بیخي له منځه تللی، همیش میکورا نومېږي، د بریتانیا د ویسټ ساکس اوسېدونکی دی او ۵۹ کلن دی. دی د ۲۰۱۸ په اګست کې په سرطان اخته شوی و.