تاند(پنجشنبه، د حمل ۱۹) د بشري حقونو د څار سازمان وايي، د افغان سولې په تړاو د استانبول په جوړېدونکې ناسته کې باید د ښځو ګډون زیات شي.
خبرپاڼه کې چې یاد سازمان پرون چهارشنبه خپره کړې، د ملګرو ملتونو له چارواکو یې غوښتي، چې د افغان سولې په تړاو په ترکیه کې د جوړېدونکې ناستې په اساسي خبرو اترو کې د افغان مېرمنو د ګډون په اړه ژمنه دې په ښکاره ډول وکړي او د مدني ټولنې ډلو ته په ځانګړو شویو حاشیوي غونډو کې دې دا ډول ژمنې نه کوي.
دوی د ملګرو ملتونو له چارواکو په ځانګړي توګه له عمومي منشي آنتونیو ګوتیرش څخه غوښتي، چې د استانبول په ناسته کې د ښځو فعال رول ته پوره پاملرنه وکړي.
د بشري حقونو د څارډلې زیاته کړې، چې امریکا د ترکیې په سرمشریزه کې د میرمنو په ګډون مهم رول لوبولی شي
دا په داسې حال کې ده چې د بشري حقوقو مدافعو بنسټونو اندېښنه څرګنده کړې چې ښايي د سولې په خبرو کې ښځو او د جګړې قربانیانو ته ونډه ورنه کړل شي.
په دغه غونډه کې به د دواړو لورو ترمنځ د جګړې د پای ته رسولو او په هېواد کې د سولې د ټينګښت په اړه خبرې اترې وشي.