تاند ( پنجشنبه، د حمل ۱۹ ) د پلازمېنې کابل په ګډون د هېواد ډېر شمېر ولایتونو کې د روژې مبارکې میاشتې په رارسېدو سره د خوراکي توکو بیې لوړې شوې دي.
د کابل ښار اوسیدونکي وایي، حکومت دې د خوراکي توکو د بیو په کنټرول کې عاجل اقدام ترسره کړي.
دوی وایي، د دې پر ځای چې د روژې مبارکه میاشت کې سوداګر او دوکانداران د خلکو لاسنیوی وکړي لا پسې نرخونه دوه برابره لوړ کړي.
کابل کې چې تر دې وړاندې د یو کیلو ګازو بیه ۵۵ افغانۍ وه، اوس یې بیه ان تر ۶۵ او ۷۰ افغانیو پورته شوې ده.
دا په داسې حال کې ده چې د روژې د مبارکې میاشتې په را رسېدو سره هرکال په بازار کې د لومړنیو خوراکي توکو بیې لوړېږي چې کمزوري اقتصاد لرونکي وګړي له ګڼو ستونزو سره مخ کوي.
د کابل ښار اوسیدونکي وایي چې سوداګر د ازاد بازار د اقتصاد څخه په استفادې توکي په لوړه بیه پلوري چې جدي ستونزې یې راپیدا کړي دي.
ورته مهال د افغانستان د صنعت او سوداګري وزارت چارواکي بیا ډاډ ورکوي چې د روژې په مبارکه میاشت کې به د خوراکي توکو نرخونه ثابت پاتې شي.
د دغه وزارت ویاند فواد احمدي وایي، د صنعت او سوداګرۍ وزارت په مشرۍ یو ګډ کمېسیون جوړ شوی چې د کابل په بازارونو کې به د خوراکي توکو بیې کنټرولوي.
د صنعت او سوداګرۍ وزارت ویاند دغه راز زیاتوي چې کابل کې د خوراکي توکو له بازارونو څخه د کمېسیون د لیدنې پر مهال د خوراکي توکو شرکتونو او واردوونکو ډاډ ورکړی چې مارکیټونو کې په کافي اندازه خوراکي توکي شته او نرخونه به ثابت پاتې وي.
د معلوماتو له مخې، د روژې مبارکې میاشتې لومړۍ ورځ به د راتلوونکي سې شنبې ورځ یعنې د حمل ۲۴ نېټه وي.