تاند(پنجشنبه، د حمل ۱۹) جرمني د افغان پناه غوښتونکو د ستنولو په لړ کې پرون (چهارشنبه) ۲۰ تنه نور افغان پناه غوښتونکي افغانستان ته راولېږل.
دا افغانان پرون (چهارشنبه) د سهار په ۶ بجې او ۴۰ دقیقې کابل ته راورسېدل.
د ډي پي اې خبري اژانس د راپور له مخې، دا د ۲۰۱۶ م کال له دسمبره له جرمني څخه خپل هیواد ته د ستنول شویو افغانانو ۳۸ مه جوپه ده.
تراوسه پورې یوزرو ۳۵ تنه هغه افغان پناه غوښتونکي بېرته افغانستان ته استول شوي چې د جرمني د چارواکو په وینا د پناه غوښتنلیکونه یې رد شوي دي.
په جرمني کې د افغانانو د لېږدلو یو شمېر منتقدان وايي چې لا هم د افغانستان امنیتي وضعیت ښه نه دی او باید هغوی په زوره بېرته ونه لېږل شي.
پرون ماښام هم د برلین د هوايي ډګر د پنځم ترمینل مخته یو شمېر کسانو مخکې تر دې چې دا شل تنه خپل هیواد ته واستول شي، مظاهره وکړه.
ځینو مظاهره چیانو سړک بند کړ ځینې نورو د برلین د هوايي ډګر جنوبي او ختیځو څنډو ته د ننوتو هڅه وکړه خو پولیسو یې مخه ونیوله.
ډي پي اې خبري اژانس وايي، د ۵۰ او ۷۵ ترمنځ کسانو ته د مظاهرې اجازه ورکړل شوې وه خو عملاً شاوخوا ۳۵۰ تنه راټول شوي وو.