تاند ( سې شنبه، د حمل ۱۷ ) د افغانستان د ملي مصالحې عالي شورا وایي، د نړیوالو او سیمه اییزو چارو د کمیسیون څلورمه ناسته نن د سه شنبه په ورځ په کابل کې جوړه شوه.
د دغې شورا ویاند فریدون خوځون وایي، په دې ناسته کې د بهرنیو چارو وزیر محمد حنیف اتمر، د سولې په چارو کې د دولت وزیر سید سعادت منصور نادري، د افغانستان دولت د مرکچي پلاوي مشر محمد معصوم ستانکزي او د نړیوالو هیوادونو او سازمانونو استازو ګډون درلود.
د ملي مصالحې د عالي شورا رییس عبدالله عبدالله دې ناسته کې وویل چې هڅه کیږي چې د استانبول په ناسته کې د افغانستان د اسلامي جمهوریت پلاوی ټول شموله او له یوې طرحې سره ګډون وکړي.
عبدالله عبدالله زیاته کړې چې سولې د طرحې د چمتو کولو کمیټه د یوې طرحې په جوړولو کار کوي.
د ملي مصالحې عالي شورا ویاند فریدون خوځون دغه راز زیاتوي چې د سولې د طرحې د مسودې د جوړولو او طرحو د یوځای کولو کمیټې کار دوام لري.
د مالوماتو له مخې د ۲۵ سیاسي ګوندونو او ملي مصالحې د عالي شورا د رهبرۍ غړو له خوا د سولې په اړه شاوخوا دېرش طرحې شورا ته وړاندې شوې دي.
ورته مهال د افغانستان ولسمشري ماڼۍ ویلي چې افغان چارواکو او سیاسیون نن په ارګ کې د سولې د نقشې د طرحې په اړه ګډه ناسته ترسره کړې ده.
د جمهوري ریاست مطبوعاتي دفتر وايي، افغان ولسمشر د سولې لارې نقشه د غونډې ګډون والو ته په څرګند ډول تشریح کړه چې جزییات به یې ډیر ژر له رسینیو سره شريک شي.
دا په داسې حال کې ده چې ویل کیږي د استانبول ناسته د اپریل په شپاړسمه جوړه او لس ورځې به دوام وکړي.