تاند (سه شنبه د حمل ۱۷) د افغانستان حکومت وايي چې ډېر ژر به په هېواد کې د اوبو د ۴۴ نورو بندونو د جوړولو چارې هم پيل شي.
د افغانستان د اوبو د تنظیم ملي ادارې په تازه څرګندونو کې ویلي چې د هېواد په ۲۱ ولایتونو کې د اوبو د لا ښه مدیریت او تنظیم لپاره د ۴۴ نورو بندونو د جوړولو پلان لري.
ددې ادارې د معلوماتو پر اساس چې یاد بندونه تر ډېره په پکتیا، زابل، پکتیکا، ارزګان، غزني، میدان وردګ، فاریاب، غور، بادغیس، کونړ، نورستان، پروان او یو شمېر نورو ولایتونو کې جوړېږي.
د اوبو چارو د تنظیم ملي ادارې ویاند نظام الدین خپلواک ویلي ددغه بندونو شمېر ۴۴ ته رسېږي او په وینا یې چې د یادو بندونو جوړولو باندې به څه باندې ۶۰۰میلیون ډالر لګښت راشي.
دې ادارې څه ورځې مخکې د یوې خبرپاڼې په خپرولو سره ویلي و چې اوس مهال په هیواد کې د اوبو د ۱۳ بندونو د جوړلو چارې روانې دي چې له دې جملې په کابل کې د شاه او عروس اوبو بند د جوړولو چارې ۹۰ سلنه مخته تللي او ټاکل شوې په نژدې وختونو کې د اوبو ذخیره کولو بهیر پکې پيل شي.
د یادونې ده چې تازه په نیمروز کې د کمال خان بند پرانیستل شوی او ټاکل شوې چې ولسمشر په نږدې ورځو کې په بدخشان کې د شورابک اوبو او برېښنا بند افتتاح کړي.
د کمال خان بند د پرانیستې پر مهال ولسمشر غني ویلي و چې د افغانستان اوبه به مهار کېږي او په خبره یې چې که ایران ترې اوبه غواړي، نو په بدل کې دې افغانستان ته تېل یا نور توکي ورکړي.