تاند ( جمعه، د حمل ۱۳) د صنعت او سوداګرۍ وزارت چارواکي خبر ورکوي چې د افغانستان او پاکستان تر منځ د ټرانزیټ او سوداګرۍ تړون پرون په کابل کې تمدید او لاسلیک شو.
له دغه وزارت څخه په خپره شوې خبرپاڼه کې راغلي چې د اپټا تمدید د پای ته رسېدو تر وخته کېدای شي، د دغه تړون نوې بڼه لاسلیک ته چمتو شي.
د معلوماتو له مخې، افغان حکومت ټنیګار کوي چې د اپټا تړون نوې بڼه باید د سوداګرۍ نړیوال سازمان پر معیارونو برابره جوړه شي.
که د اپټا تړون د نړیوال سازمان له معیارونو سره سم جوړ شي، پر بنسټ به یې افغان سوداګر وکولای شي د پاکستان له لارې هند ته د خپلو سوداګریزو مالونو کچه ډېره کړي.
دغه راز به بدل کې پاکستان د افغانستان له لارې د منځنۍ اسیا هېوادونو ته سوداګریزه لار پیدا کړي.
دا په داسې حال کې ده چې د دواړو هېوادونو چارواکو یوه میاشت مخکې د دریو میاشتو لپاره د دغه تړون غځېدو پر سر هوکړه کړې وه.