تاند (دوشنبه، د حمل ۹) د ایران د بهرنیو چارو وزیر جواد ظریف وایي د افغانستان د سولې په مسئله کې بشپړې همکارۍ ته تیار دي.
نوموړي د تاجکستان په پلازمینه دوشنبې کې له خبریالانو سره د خبرو پر مهال ویلي، چې د اسیا زړه هېوادونو په کنفرانس کې یې هڅه دا ده چې په سیمه کې یو دایمي ثبات رامنځ ته شي.
د ظریف په وینا ایران د افغانستان د سولې په پروسه کې بشپړې همکارۍ ته تیار دی او زیاتوي چې په دې برخه کې د سیمې د هېوادونو همکاري هم اړینه ده.
د نوموړي په خبره د سیمې هېوادونه باید په ګډه همکارۍ په افغانستان کې د جګړې د ختمولو لپاره مرسته وکړي او په دغه هېواد کې دې د سولې د راتګ لپاره سره یو لاس شي.
جواد ظریف داسې مهال دا څرګندونې کوي چې تازه ولسمشر غني هم نن د یوه لوړپوړي پلاوي په مشرۍ په یادکنفرانس کې د ګډون په موخه د تاجکستان پلازمینې دوشنبې ته تللی دی.
ارګ په یوه خبرپاڼه کې ویلي، چې ولسمشر به په دې دوه ورځني سفر کې د اسیا زړه هېوادونو په کنفرانس کې له ګډون او وینا سربېره د تاجکستان له ولسمشر امام علي رحمن، لومړي وزیر او د هغه هېواد د پارلمان رییس سره وګوري او پر یو لړ مسایلو به خبرې وکړي.