تاند ( یکشنبه، د حمل ۸ مه) راپورونه وایي، څېړوونکو په یوه تازه څېړنه کې موندلې چې واده کولی شي د لیونتوب خطر کم کړي.
د نیورولوجي، نیورو سرجري او سایکایټري څېړنیزې مجلې له لوري په یو تازه خپره شوې څېړنه کې ادعا شوې چې اړیکې کېدای شي د لېونتوب خطر سره تړلې وي.
دې څېړنه کې د ۱۵ نورو څېړنو چې له ټولې نړۍ څخه له ۸۱۲۰۰۰ څخه ډېرو کسانو په کې ګډون کړی و معلومات را ټول شوي دي.
د معلوماتو له مخې، د دې تازه څېړنې په ترڅ کې د انګلستان څېړونکو هغه کسان چې کونډ شوي، طلاق يي اخیستی یا هېڅ واده يي نه دی کړی له هغو کسانو سره چې ودونه يي کړي دي پرتله کړي دي.
د څېړنو پایلې په ډاګه کړې چې د واده شویو په پرتله کونډ شویو خلکو کې د لېونتوب رامنځته کېدو خطر ٪۲۰ او هغو کې چې هېڅ واده يې نه وي کړی دغه خطر ٪۴۲ لوړ وي.
د څېړوونکو په باور، واده له مختلفو لارو د لېونتوب رامنځته کېدو خطر کموي.
څېړوونکي دغه راز زیاتوي چې واده په ورځني ډول په مختلفو کچو د شخصي تعامل او ټولنیزو ښکېلتیاو لامل ګرځي کوم چې د لېونتوب په ګډون د ډېرو روغتیايي او عصبي ستونزو څخه مخنیوی کولو کې مرسته کوي.
دا په داسې حال کې ده چې په افغانستان کې د ځینو ناوړه دودونو په اساس ډیری ځوانان واده په اسانه نه شي کولای او ددې لپاره باید په ډېرو سختو شرایطو او تکلیفونو کې کار وکړي څو د واده لپاره امکانات برابر کړي.
له دغو دودونو یو هم د ولور لوړوالی یادولی شو چې لا هم په ډېرو سیمو کې یو عام او رواجي دود ګرځیدلی دی.