تاند (دوشنبه د حمل ۲) د کندوز ولایت ځايي مسؤلین وایي، له مرکزي اسیا د افغانستان له لارې پاکستان ته د برېښنا د لېږد (کاسا زر) پروژې چارې په چټکۍ سره مخته روانې دي.
د کندز ولایت رسنیز دفتر په یوه خبرپاڼه کې راغلي چې په کندوز کې د کاسا زر پروژې چارې په چټکۍ مخ ته روانې دي او د برېښنا د لېږد دغه پروژه به په خپله ټاکلې نېټه بشپړه شي.
د کاسا زر پروژې له لارې له تاجکستان او قرغزستان څخه ۱۳۰۰ مېګاواټه برېښنا افغانستان او پاکستان ته لېږدول کېږي.
ددغه پروژې ستنې د کندوز، بغلان، کاپیسا، پنجشنېر، کابل، لغمان او ننګرهار ولایتونو له ۳۵ ولسوالیو تېرېږي.
د دې پروژې لومړنۍ ستنه د ۲۰۲۰ کال د اپرېل په ۲۳مه د کندوز شېرخان بندر سیمه کې لګول شوې وه.
د پروژې ټول لګښت ۲۳۴ میلیونه ډالر ښودل شوی او ټاکل شوې چې تر ۲۰۲۲ کال پورې یې چارې بشپړې او دغه پروژه به افتتاح شي.