تاند ( دوشنبه، د حمل ۲/ ۱۴۰۰) ولسمشر محمد اشرف غني د بزګر ورځې په مناسبت یو پیغام کې ویلي، د کرنې د ودې لپاره به ډېر ژر د کمال خان بند پرانیزي.
هغه ویلي: «موږ به ژر د کمال خان بند چې د کرنې په وده او اوبولګولو کې مهم رول لري، پرانیزو، د هیواد په نورو ولایتونو کې هم د اوبو کانالونو د جوړولو کار جریان لري».
ولسمشر زیاتوي، د بزګرانو د ملاتړ په موخه د بازار موندنې او د مناسب داخلي او بهرني مارکیټ په برخو کې هم منظمې برنامې په پام کې لري.
دده په خبره د هېواد په بېلو سیمو کې د اوبو د تنظیم او مدیریت له لارې غواړي دلته کرنه وده وکړي او افغان بزګران وکولی شي له اسانتیاوو په استفادې خپل محصولات ډېر کړي.
هغه زیاته کړې، د کرنې په برخه کې افغان حکومت منظم پلانونه لري چې له مخې به یې هېواد په راتلونکو کلونو کې د ګاونډیو له احتیاجه خلاص شي او پر ځان به بسیا وي.
د یادونې ده چې د تېر ۱۳۹۹ کال د کب په ۳۰ مه نېټه د اوبو د تنظیم ملي ادارې خبر ورکړی وو چې د نوي کال په څلورمه ورځ به د کمال خان بند په رسمي ډول پرانیستل شي.
د دغې ادارې ویاند نظام الدین خپلواک تاند سره خبرو کې ویلي وو دا بند به د ولسمشر اشرف غني په ګډون د کابېنې د ګڼو غړیو په شتون کې پرانیستل شي.
د یاد بند د پرانیستل کېدو لپاره له تېرې یوې اونۍ راهیسې چمتووالی روان دی.
د اوبو د تنظیم ملي ادارې په خپله فیسبوک پاڼه د کمال خان بند د پرانیستو د مراسمو چمتووالي عکسونه خپاره کړي چې پکې ښکاري د یاد بند شاوخوا د افغانستان په درې رنګه بیرغونو پوښل شوې ده.
د یادې ادارې ویاند زیاته کړې وه، د کمال خان بند په شمول څه ناڅه يو نيم سل مهمې او سترې ملي او لویې پروژې نورې هم پرانېستل کېږي.
د معلوماتو له مخې، کمال خان بند د ۵۲ میلیونه متر مکعب اوبو د ذخېره کولو وړتیا لري او د دې تر څنګ به ۱۷۴ زره هکټاره کرنیزه ځمکه خړوبوي.
دا په داسې حال کې ده چې کمال خان بند چې په چهاربرجک ولسوالۍ کې د هلمند پر سیند جوړ شوی او د ۹ مېګا واټه برېښنا د تولید ظرفیت هم لري.
د اوبو چارو د تنظیم ملي اداره وایي، په کمال خان بند کې د اوبو د راګرځولو چارې پیل شوي او اوس مهال د سیستان وچه دښته سپېره نه، بلکې له اوبو ډکه شوې ده.