تاند (جمعه د حوت ۲۹) په هرات کې تېز باد او طوفان څلور کسان مړه کړي دي او لس نور ټپیان دي.
د راپورونو له مخې، طوفان نن د ورځې شاوخوا ١٢ بجې پیل شوی دی.
د هرات د عامې روغتیا رئیس عبدالحکیم تمنا ویلي چې د باد او تېز طوفان له امله ونې او دېوالونه راپرېوتي چې یوه ښځه او درې سړي یې وژلي او لس نور ټپیان دي.
د نوموړي په وینا په ټپیانو کې درې ماشومان، دوه ښځې او پنځه نارینه شامل دي.
د ښاغلي تمنا په خبره، د ژوبلو کسانو روغتیايي وضعیت د ډاډ وړ دی.