تاند ( جمعه، د کب ۲۹) د افغانستان د بهرنیو چارو وزارت د مسکو غونډې د وروستۍ اعلامیې هر کلی وکړ چې پکې ویل شوي د اسلامي امارت د بیا ځلې ملاتړ نه کوي.
د روسیې، امریکا، پاکستان او چین هېوادونو د غونډې په ګډه اعلامیه کې د اسلامي امارت د بیا راتګ مخالفت شوی او له طالبانو غوښتل شوي چې پسرلني عملیات پیل نه کړي.
بهرنیو چارو وزارت د خبرپاڼې په خپرولو سره ویلي چې افغان حکومت د هغې سیاسي حل لارې ملاتړ کوي چې د افغانانو د حقونو ساتلو لامل شي.
هغه اعلامیه چې د څلورو هېوادونو د استازو له لوري خپره شوې پکې ویل شوي چې یاد هېوادونه د اسلامي امارت د بیا راتګ ملاتړ نه کوي.
بلخوا، پرونۍ غونډې ته د طالبانو د مذاکره کوونکي پلاوي مشر شیخ عبدالحکیم حقاني ویلي چې دا ډله په افغانستان کې د اسلامي نظام غوښتونکې ده او د بل هر ډول نظام پر وړاندې به افغانان جهاد ته دوام ورکړي.
دا په داسې حال کې ده چې د مسکو غونډې دوهمه ورځ نن د بندو دروازو تر شا ترسره شوه او راپورونه وایي چې افغان حکومت او طالبان پکې د مذاکراتو د چټکتیا هوکړې ته رسیدلې دي.