تاند(سې شنبه، د حوت ۲۶) وروسته له دې چې یو شمېر هیوادونو د استرازینیکا واکسین د خوندیتوب په اړه شکونه څرګند کړل او دا واکسین یې منع کړ، د روغتیا د نړیوال سازمان د واکسین د خوندیتوب د برخې متخصصان نن د دې واکسین په اړه بحث کوي.
د روغتیا نړیوال سازمان له هیوادونو غوښتې دي چې د کورونا ویرس پرضد د بریتانیا او سویدن دغه ګډ جوړ کړی واکسین ونه دروي.
د روغیتا د نړیوال سازمان په باور، داسې هیڅ نخښې نه شته چې د ویني غوټه کیدل دې له استرازینیکا واکسین سره ارتباط ولري.
یوشمیر لویو اروپایي هیوادو جرمني، فرانسې او ایتالیا د دوشنبې په ورځ اعلان وکړ چې د دغه واکسین ورکړه به وځنډوي.
پرتګال، اسپانیا، لتویا او سلوانیا هم بیا له دغو هیوادو سره یوځای شول. تر دې مخکې هالنډ، بلغاریا، ایرلنډ، ډنمارک او ناروې د استرازینیکا واکسین درولی و.
د روغتیا نړیوال سازمان وايي، د استرازینیکا واکسین او په رګونو کې د وینې د غوټه کېدو ترمنځ ارتباط نه شته.
دې ادارې له هیوادونو غوښتي چې د استرازینیکا واکسین تطبیق ته دوام ورکړي ځکه چې داسې کومه نښه نه شته چې ثابته کړي د هغو کسانو په رګونو کې د وینې غوټه کېدا له دې واکسین سره تړاو لري چې په وروستیو ورځو کې یې خبرونه په څو اروپايي هیوادونو کې خپاره شوي وو.
تېره اوونۍ ډنمارک او ناروې د کورونا وایرس پر ضد د استرازنیکا واکسیناسیون په موقتي ډول ودراوه.
ډنمارکي چارواکو د پنجشنبې په ورځ وویل، د ځینو جدي جانبي عوارضو د لرلو له کبله یې د دغه واکسین د ورکولو بهیر درولی دی.
راپورونه وايي چې په ډنمارک کې یو تن وروسته له دې مړ شوی چې دا واکسین یې وکړ.
د ډنمارک د روغتیا وزیر په یوه ټویت کې لیکلي چې په دې اړه وروستۍ پرېکړه اوس ممکنه نه ده او نورو څېړنو ته اړتیا ده.
له ډنمارکه وروسته ناروې وویل چې د نویو کلینیکي نتیجو تر څرګندېدو پورې د استرازینیکا واکسین ورکړه دروي.
د روغتیا نړیوال سازمان په یوه اعلامیه کې ویلي چې د متخصصانو یوه کمېټه یې پر دغو راپورونو غور کوي خو دې ادارې په عین حال کې ویلي چې د وینې د غوټه کېدو او واکسین ترمنځ د ارتباط لپاره هیڅ دلیل نه شته.
د افغانستان د عامې روغتیا وزارت هم روانه اوونۍ وویل چې په دې اړه خپاره شوي راپورونه نه تاییدوي او تر یو نیم کال پورې به د هیواد په سلو کې ۶۰ وګړو د کورونا پر ضد واکسین شي.
په امریکا کې د ناروغیو د کنټرول او مخنیوي اداره وايي، تر پرون شنبې پورې په دغه هیواد کې څه باندې ۱۰۵ ملیونه او ۷ لکه ۳ زره ډوزه واکسین خلکو ته ورکړل شوي دي.
د دغه مرکز په وینا نژدې ۶۹ ملیون امریکایانو ته د مودیرنا، فایزر او بیواین ټیک او جانس انډ جانسن واکسین تطبیق شوی دی.
په امریکا کې د واکسیناسیون له چټکتیا سره د کورونا وایرس مثبتې پېښې د پام وړ کمې شوې دي.
د امریکا ولسمشر جو بایډن ویلي چې تر جولای پورې به ټول بالغ امریکایان د کورونا پر ضد واکسین شي.