تاند ( سې شنبه، د کب ۲۶) د پکتیا ولایت دیني عالمان دې ولایت کې د خطبو، تقریرونو او عامه پوهاوي د کمپاین له لارې خلک او کورنۍ هڅوي څو خپل اولادونه ښوونځیو کې شامل کړي.
د یاد ولایت دیني عالمانو د سې شنبې په ورځ د ((اسلامي معارف، افغاني معارف او غیر سیاسي معارف)) تر شعار لاندې د عامه پوهاوي د کمپاین لپاره د دیني عالمانو او د پوهنې د چارواکو په یوه غونډه کې وویل چې غواړي له دې لارې خلک د خپلو ماشومانو تعلیم ته وهڅوي.
د پکتیا د دارالعلوم استاد مولوي حمدالله حماس وایي، دیني عالمان غواړي، د ټولنې وګړي وهڅوي څو خپلې لوڼې او زامن ښوونځیو او دیني مدرسو کې شامل کړي.
د پکتیا د دیني عالمانو دا تازه هڅه داسې مهال ده چې لا هم د هېواد ډیری وګړي او د مدرسو زده کوونکي د دیني زده کړو لپاره بهر هېوادونو ته ځي.
بل خوا د پکتیا د پوهنې ریاست چارواکي وايي، دوی چمتو دي تر څو د دې ولایت د ټولو سیمو خلکو ته په متوازن ډول ښوونیز خدمتونه وړاندې کړي.
د پوهنې رئیس کوچي ځاځي ددې ستونزې په اړه چې تر اوسه ډیری دیني مدرسې له حکومت سره رسمي نه دي وویل، د هرې دیني مدرسې چلوونکي او مهتممین چې وغواړي رسمي شي او د ښوونځیو په شان امتیازات ولري، دوی ورته پوره تیاری لري.
هغه زیاتوي، په نوي ښوونیز کال کې به تر ۱۲ پورې دیني مدرسې رسمي او د ښوونځیو له امتیازاتو برخمنې شي.
د یادونې وړ ده چې د افغانستان د سړو سیمو د زده کوونکو د زده کړو بهیر پیل شوی او دا مهال يې کلنۍ ازموینې پای ته رسیدو ته نږدې شوي دي.
دا په داسې حال کې ده چې د هېواد په ځینو سیمو کې نا امني، نږدې ښوونځیو ته نه لاسرسی، د ښوونځیو د ودانیو همدارنګه د درسي کتابونو او مسلکي ښوونکو کمښت د پوهنې د بهیر پر وړاندې له مهمو ستونزو څخه ګڼل کیږي.