تاند (یکشنبه د حوت ۲۴) ناپېژاندو وسله والو تېره شپه د پښتون ژغورنې غورځنګ پر مشر منظور پښتين او د هغه په ملګرو بريد کړی چې نوموړی او ملګري یې له دې برید روغ وتلي.

د راپورونو له مخې، پښتين هغه مهال د بريد ښکار شو چې هغه او ملګري يې د بټګرام نومي سيمې ته تللي وو او کله چې بېرته راتلل د مانسيره ټول پلازه کې یې پر موټر ناڅرګندو وسله والو چې سپنې جامې يې پر تن وې د ډبرو حمله وکړه.

سرچینې وايي له دې سره هم مهاله هوايي ډزې وشوې، خو پښتين او ملګري يې راغونډ شول او د پېښې له ځايه ووتل.

د پښتون ژغورنې غورځنګ غړي وایي چې په دې برید کې چاته زیان نه دی اوښتی خو د دوی په خبره دا په سپینه جامه کې د ریاستي ادارو د مامورینو کار دی.

د دغه غورځنګ غړیو پر پاکستاني ادارو په ځانګړې توګه ای اس ای تور پورې کړی دی چې تل یې د سوله ییزو او بې وسلې امن غوښتونکو پر وړاندې ورته ګامونه پورته کړي دي.

هغوی خبرداری ورکړی دی چې دوی به پر دې پېښه چوپ پاتې نه شي او له پاکستاني ریاست څخه به د دې ناوړه عمل پوښتنه خامخا کوي.

په ورته مهال د پښتون ژغورنې غورځنګ مخکښ او د قامي اسمبلۍ غړي محسن داوړ دا برید په کلکو ټکو غندلی او ویلي یې دي چې پر پښتين بريد پر ټولو پښتنو بريد دی.

Strongly condemn the attack on @ManzoorPashteen, Usman Kakar, Haji Abdul Samad and our PTM friends at the Mansehra Toll Plaza. The state continues to use all of its might to threaten, harass and attack peaceful activists. #DaSangaAzadiDa

— Mohsin Dawar (@mjdawar) March 14, 2021

منظور پښتين بیا نن یکشنبه پر خپله فېسبوک پاڼه لیکلي چې دی او ملګري یې ښه دي، « د مظلومو خلکو دعاګانې له موږ سره دي ، زما ملګری او زه خوندي یو.  ستاسو پیغامونه را روان دي ، زه ستاسو د مینې  پوروړی یم.  رياست به د خپل طرفه موږ ته د زيان رسولو  هره هڅه وکړي خو موږ به د خپل دریځ څخه یو انچه هم شا نه شو او د حق خبره به  کوو. پي ټي ايم زنده باد.»

که څه هم ددې برید مسؤلیت تر اوسه کوم چا یا ډلې نه دی منلی، خو پښتین یې پړه پر پاکستاني حکومت اچولې ده.

باید وویل شي چې دا لومړۍ ځل نه دی چې د پښتون ژغورنې غورځنګ پر مشر او غړو بريد کېږي، بلکې له دې مخکې هم څو څو ځله د ياد غورځنګ پر پلويانو، غړیو او مشرانو د مرميو بريدونه شوي چې دوی یې پاکستاني استخبارات او حکومت مسؤل بللی.