تاند (شنبه د حوت ۲۳) د سرپل ولایت په سانچارک ولسوالي کې د کور د چت غورځېدو له امله ۴ ماشومان مړه شوي او ۲ نور یې ټپیان شوي دي.
د یادې ولسوالي ولسوال، نقیب الله دقیق رسنیو ته ویلي: “تېره شپه د سخت باد او طوفان له امله د سانچارک ولسوالي په ګراب سیمه کې د یو کور چت نړیدلی، چې څلور ماشومان پکې مړه شوي او دوه تنه نور ټپیان شوي دي.”
د ولسوال په خبره په پېښه کې دوه د پاخه عمر کسان ټپیان او په مړو شوو کې دوه نجونې او دوه هلکان شامل دي.
د سیمه ایزو چارواکو په خبره یاده سیمه له تېرو شپږو میاشتو راهیسې د طالبانو په لاس کې ده.
په همدې حال کې د هرات ولایت چارواکي بیا وایي چې په دې ولایت کې هم د باد او طوفان له امله د ښوونځي لوحه راغورځېدلې چې یوه زده کوونکې پکې مړه شوې ده.
د یادو پېښو خبر په داسې حال کې خپریږي چې نن د هوا پېژندنې ملي ادارې وویل، د هېواد په نیږدې ۳۰ ولایتونو کې د واورې او باران د ورښت او سیلابونو د راوتلو اټکل شوی دی.