تاند ( پنج شنبه، د حوت ۲۱) د پاکستان لومړي وزیر عمران خان یو ځل بیا ویلي چې افغان جګړه یوازې د خبرو له لارې د ختمېدو وړ ده.
عمران خان تېره ورځ ناوخته د ازبکستان د بهرنیو چارو له وزیر عبدالعزیز کاملوف سره د لیدنې پر مهال ویلي چې په افغانستان کې د سیاسي حل له روان بهیر ملاتړ کوي او په دې باور دی چې دغه جګړه یوازې د خبرو او مذاکراتو له لارې ختمېدلی شي.
نوموړي همدا راز ویلي چې له افغانستان سره د ښو اړیکو غوښتونکی دی او ازبکستان سره یې ژمنه کړې چې د افغانستان له لارې به ګوادر ته د ازبکستان لاسرسی اسانه کړي.
عمران خان تر دې وړاندې هم ټينګار کړی چې افغان جګړه یوازې د خبرو له لارې ختمېدلی شي.
هغه دا هم ویلي چې افغانستان ته د ثبات په راتګ سره به د پاکستان او مرکزي اسیا د هېوادونو ترمنځ سوداګري او ترانزیت پراختیا ومومي او سیمې ته به اقتصادي وده راشي.
عمران خان داسې مهال دا څرګندونې کوي چې تازه ولسمشر غني له افغان سیاسیونو سره د سولې د نوو پرمختګونو په تړاو خپلې غونډې پيل کړې دي.
ارګ په یوه خبرپاڼه کې ویلي چې ولسمشر غني تېره ورځ ناوخته په ارګ کې د ځینو سیاسي ګوندونو له مشرانو او سیاسي شخصیتونو سره د سولې پر نوو پرمختګونو او اړوندو مسایلو خبرې کړې دي.