تاند (چهارشنبه، د حوت ۲۰) د امریکا د استازو مجلس ډېری غړو د بایډن له ادارې د ایران پر وړاندې د اقداماتو غوښتنه کړې ده.
د یاد هېواد د استازو مجلس شاوخوا ۱۴۰ غړو په یوه لیک کې د امریکاد بهرنیو چارو وزیر ته ویلي چې د ایران پر وړاندې دې ژر تر ژره خپل دريځ روښانه کړي او دغه هېواد دې لا ډېرو ورانکاره فعالیتونو ته نه پرېږدي.
د امریکا د استازو مجلس ډېری غړو ویلي چې حکومت باید د ایران پر درېیو چارو څارنه وکړي، چې په دې کې اټومي پروګرام، د توغندیو پروګرام او په سیمه کې د دغه هېواد له لوري د ترهګرو ډلو ملاتړ شامل دي.
دوی پر ایران د لا ډېرو بندیزونو او فشارونو غوښتنه هم کړې ده او ویلي یې دي چې دغه هېواد باید له خپلو اټومي فعالیتونو را وګرځول شي.
د امریکا د استازو مجلس داسې مهال له بایډن نه دا غوښتنه کوي چې تازه تېره ورځ داسې راپورونه خپاره شول چې ایران تازه د یورانیو دغني کولو نوې لړۍ پيل کړې ده.