تاند(شنبه، د حوت ۱۶) د ولسي جرګې رییس میر رحمان رحماني یو ځل بیا پر حکومت غږ کړی دی چې په ادارو کې دې د سرپرستۍ موضوع دې پای ته ورسوي.
نوموړي نن د ولسي جرګې د اوولسمې دورې د پرانیستې په مراسمو کې د خبرو پر مهال ویلي چې حکومت باید هر څومره ژر چې کېږي د پاتې وزارتونو لپاره نوي وزیران د اعتبار رایې اخیستو لپاره دغې جرګې ته ورمعرفي کړي.
رحماني دغه راز له طالبانو غوښتنه کړې چې تاوتریخوالی کم کړي او د سولې ټینګښت لپاره نرمښت وښیي.
هغه زیاته کړې چې طالبان باید له هغو طرحو لاس پر سر شي چې اجرایي جنبه نه لري.
نوموړي د خپلو خبرو پر دوام ویلي چې که چېرته طالبان غواړي د افغانستان په تاریخ کې په عزت یاد شي نو باید تاوتریخوالی کم او تلپاتې اوربند ته غاړه کېږدي.