تاند(پنجشنبه، د حوت۱۴) د افغانستان د سولې لپاره د امریکا ځانګړی استازی زلمی خلیلزاد د مشارکتي حکومت په اړه له طالبانو سره د خپلې طرحې په باب د خبرو لپاره نن (پنجشنبه) دوحې ته ورسېد.
خلیلزاد ویلي چې د افغانستان د سولې پر پروسې او د دې پروسې د چټکولو پر لارو چارو د خبرو لپاره دوحې ته تللی دی.
خو ده تر دې مخکې په تېرو څو ورځو کې په کابل کې د ولسمشر غني په شمول له بېلابېلو اغېزمنو څېرو سره د یوه مشارکتي یا انتقالي حکومت د جوړېدو پر طرحې خبرې وکړې.
خلیلزاد په خپله ویلي دي چې په دې اړه هغو خواوو مثبت نظر درلود چې ده ورسره خبرې کړي دي.
د ولسي جرګې ځینې غړي وايي چې خلیلزاد د مشارکتي حکومت د جوړېدو په صورت کې د افغانستان په اساسي قانون کې د بدلون په اړه ورسره خبرې کړي دي.
د دې جرګې څو غړیو رسنیو ته ویلي چې خلیلزاد ورڅخه غوښتي چې په اساسي قانون کې پر تعدیل غور وکړي.
خلیلزاد په داسې حال کې د سولې لپاره تازه هلې ځلې پیل کړي چې د ولسمشر جو بایډن حکومت د طالبانو او امریکا د تېر کال د فبرورۍ د ۲۹ نېټې پر موافقې بیا کتنه پیل کړې ده.
امریکايي چارواکي وايي چې طالبانو د دې موافقې شرطونه نه دي عملي کړي. خو خلیلزاد وايي چې امریکا لا هم پر دې موافقه ولاړه ده خو د افغانانو ترمنځ د سولې خبرې ډېرې ټکنۍ دي چې باید تېزې شي او مخکې تر دې چې دواړه خواوې د جګړې اور تېز کړي پر اوربند او روغه جوړه موافقې ته ورسېږي.
په قطر کې د افغانستان د دولت او طالبانو مرکچي پلاوي له څو میاشتو راهیسې په زړه نا زړه خبرې کوي او په لړ کې یې د پام وړ پرمختګ نه لیدل کېږي.
د تاند چلونکیو څخه هیله کیږی چی د افغان ملت دوښمن خلیلزاد تصویر سره د افغانستان بیرغ لیری کړۍ او افغان ملت باید تحقیر نشی !!!