تاند ( پنج شنبه، د حوت ۱۴) ناپېژاندو وسله والو د ننګرهار ولایت په سره رود ولسوالۍ کې د یوې کارخانې ۷ کارګر وژلي دي.

ځايي سرچینې وايي چې دا پېښه تېره شپه د سره رود ولسوالۍ په مارغونډۍ سیمه کې رامنځته شوې ده.

دوی وایي وژل شوي کسان د ګچو د یوې کارخانې (مزدوران) دي.

بل لورته د ننګرهار امنیه قومندان پاسوال جمعه ګل همت هم دا پېښه مني او وایي په دې پېښه کې ۷ تنه وژل شوي دي.

ښاغلی همت وایي د پېښې لامل لا معلوم نه دی او په اړه یې څېړنې روانې دي.

نوموړی وایي په دې تړاو یې ۴ شکمن کسان هم نیولي چې ترې څېړنې روانې دي.

د دې پېښې مسوولیت تر اوسه چا نه دی منلی.

دا په داسې حال کې ده چې نن سهار د جلال اباد ښار په درېمه ناحیه کې یوې رېکشا پورې نښلو شوي ماین چاودنې د حوزوي روغتون یوه ډاکټره ووژله.