تاند (سه شنبه د حوت ۱۲) د افغانستان د بهرنیو چارو وزارت وايي چې ددغه وزارت سیاسي مرستیال میرویس ناب د تاجکستان پلازمینې دوشنبې ته د خپل سفر په ترڅ کې له خپل سیال خسرو ناظري سره ناسته کې په یو شمېر مسایلو خبرې وکړې.
د افغانستان د بهرنیو چارو وزارت نن سه شنبه د یوه بیان په خپرولو سره ویلي په دې لیدنه کې د اسیا زړه هېوادونو کنفرانس پر جوړېدو، بین الافغاني خبرو او ددواړو لوریو ترمنځ د اړیکو پر پراختیا خبرې وشوې.
تاجک چارواکو په دې لیدنه کې ویلي چې دوی له افغانستان سره په بېلو برخو کې همکاریو ته تیار دي.
د تاجک چارواکیو په خبره دوی د هغې سولې ملاتړ کوي چې د تېرو کلونو لاسته راوړنې په کې خوندي وي او روانې جګړې ته د پای ټکی کېږي.
د معلوماتو له مخې په دې لیدنه کې تاجکستان ته د ولسمشر محمد اشرف غني د راتلونکي سفر په هکله هم خبرې وشوې.