تاند(یکشنبه، د حوت۱۰) د امریکا د درملو او خوراکي موادو ادارې له کورونا سره د مبارزې لپاره د جانسن انډ جانسن واکسین ته د تطبیق اجازه ورکړه.
دا په امریکا کې د کورونا وایرس ضد درېم واکسین دی چې د متحدو ایالتونو د درملو او خوراکي موادو اداره یې رسماً تاییدوي.
د جانسن انډ جانس ایف ډي اي واکسین ځانګړتیا دا ده چې د کورونا وایرس د ټولو ډولونو مخه نیسي او د نورو په شان په دوو پړاوونو کې نه پیچکاري کېږي بلکې یو ډوز یې کفایت کوي.
د مودرنا او فایزر انډ بیو این ټیک واکسینونه تراوسه ډېر بریالي ثابت شوي او نژدې ۵۰ ملیونو امریکایانو ته تزریق شوي خو باید هر څوک دوه ځلې واکسین شي.
د جانسن انډ جانس واکسین په اړه ازمېښتونه ښيي چې د کورونا په مخنیوي کې ۸۵ سلنه بریالی دی.
جانسن انډ جانسن کمپنۍ تراوسه پورې د امریکا له حکومت سره د ۱۰۰ ملیون ډوزه واکسین قرارداد کړی دی.
بریتانیا، کاناډا او اروپايي اتحادیې هم جانسن انډ جانسن ته د ۵۰۰ ملیون ډوزه واکسین فرمایش ورکړی دی.