تاند ( شنبه، د کب ۹) د افغانستان ملي دفاع وزارت لومړی مرستیال شاه محمود میاخېل وایي، افغان ځواکونه پیاوړي دي او د ټولو ګواښونو پر وړاندې د مبارزې وړتیا لري.
نوموړي نن د کب د نهمې د سرتېري ورځې په مناسبت په جوړو شویو مراسمو کې د خبرو پر مهال وویل چې افغان سرتېري پیاوړي دي او ولس دې اندېښنه نه کوي.
د شا محمود میاخیل په وینا د سولې لپاره مو قرباني ورکړه او ۵ زره طالب زندانیان مو آزاد کړل، خو آزاد شوي زندانیان بېره د جګړې لیکو ته ستانه شول، له همدې امله تېر کال د امنیتي ځواکونو لپاره یو سخت کال وو.
هغه ټینګار وکړ چې د سولې د پروسې ملاتړ کوي، خو که وسله وال طالبان جګړو ته ادامه ورکړي نو افغان پوځ یې پر وړاندې مبارزې ته تیار دی.
د کب یا حوت نهمه چې د سرتېري ملي ورځې په نوم نومول شوې، چې مراسم یې ټول هېواد کې نمانځل کیږي.
شاوخوا شپږ کاله وړاندې د کب نهمه د ولسمشر غني لخوا د سرتېري په نوم ونومول شوه.
په دې ورځ بېلابېلو ولایتونو کې حکومتي بنسټونه د سرتېري ورځ نمانځي، د هغوی قربانۍ او مېړانې ستایي.
په ځېنو ځایونو کې ولسونه هم د خپلو سرتېرو ته ډالۍ ورکوي او غاړه کې یې ګلان وراچوي.