تاند ( جمعه، د حوت ۸) د جرمني حکومت په افغانستان کې د خپلو پوځيانو ماموریت وغځوره.
د یاد هېواد حکومت دا پرېکړه اوس د دغه هېواد د فدرالي پارلمان تایید ته هم اړتیا لري.
بهرنۍ رسنۍ د جرمني د حکومت ویاند سټیفن سایبرټ له قوله وایي چې د حکومت دغې پرېکړې له مخې، جرمني ځواکونه به تر لسو نورو میاشتو په افغانستان کې پاتې کېږي.
په افغانستان کې د جرمني پوځيانو د ماموریت غځولو پرېکړه د ناټو د دفاع وزیرانو له ناستې نږدې یوه اوونۍ وروسته وشوه.
د یادونې ده چې جرمني اوسمهال په افغانستان کې ۱۱۰۰ پوځيان لري او تر امریکا وروسته دا په افغانستان کې د بهرنیو پوځيانو لوی شمېر دی.
د جرمني د حکومت ویاند سټیفن سایبرټ ویلي، د نوې پرېکړې له مخې به لږ تر لږه ۱۳۰۰ جرمني پوځیان په افغانستان کې حضور ولري.
سټیفن وویل دا پرېکړه د افغانستان وضعیت ته په پام سره شوې ده.
په افغانستان کې د بهرنیو ځواکونو وتل او مېشت کېدل تر ټولو جنجالي موضوع ده ځکه طالبان د بهرنیو ځواکونو پر وتلو ټینګار کوي خو بهرنیان بیا وایي چې طالبانو خپلې ژمنې نه دي عملي کړي او ښايي د دوی ماموریت وغځېږي.
په ورته مهال د افغانستان د ملي امنیت سلاکار حمدالله محب ویلي، په افغانستان کې د سولې د هڅو د پیاوړتیا او د تاوتریخوالي مخنیوي لپاره پر طالبانو د ملګرو ملتونو امنیت شورا بندیزونه مهم دي.
محب دا څرګندونې د ملګرو ملتونو د امنيت شورا د بندیزونو هغې کمېټې ته چې پر طالبانو د ۱۹۹۸ کال د بندیزونو څارنه کوي کړې دي.
نوموړي یادې کمېتې ته ویلي، افغانستان او متحدین به یې دا ډاډ ترلاسه کوي چې پر طالبانو د ملګرو ملتونو بندیزونه دا ډله له تاوتریخوالي راګرځوي او د سولې هڅې پیاوړې کوي.