تاند ( سې شنبه، د کب ۵ ) د ننګرهار ځایي چارواکي په شیرزادو ولسوالي کې د روانو عملیاتو تر بشپړیدو وروسته دې ولسوالي کې د بیا رغونې د پروژو د تطبیق کېدو خبر ورکوي.
دغه ولسوالي کې له شاوخوا یوې میاشتې راهیسې ګډو افغان امنیتي ځواکونو له وسله والو څخه د دغو ولسواليو د پاکولو په موخه چاڼيز او جګړه ييز عمليات پیل کړي چې د شېرزادو ډيری سيمې یې د طالبانو له شتونه پاکې کړي او وایي ډېر ژر به عمليات حصارک ته هم وغځول شي.
په ختيځ کې د ۲۰۱ سيلاب قول اردو د درېيمې پلې لوا قوماندان بريد جنرال محمد کريم نيازی وایي، د دې عملیاتو له پیله تر دا مهاله له ۱۲۰ ډېرو وسله والو ته مرګ ژوبله اوښتې ده.
نیازی زیاتوي: (( لسګونه واړه او لوی کلي له وسله والو پاک شوي او يوازې يو لوی کلی پاتې چې د هغې تر نيولو وروسته به عمليات حصارک ولسوالۍ ته وغځول شي.))
د هغه په وینا، د عملياتو پرمهال ګندمک، طوطو، پنکزي پيټلو او اشپان لوی کلي چې لسګونه واړه کلي کېږي پاک شوي او ډېر ژر به جوکان هم ونيول شي چې تر هغې وروسته به د حصارک د نيولو لړۍ پيل شي.
په ورته وخت کې د ننګرهار والي ضیاءالحق امرخېل وايي، چې شېرزادو او حصارک ولسوالیو کې عملیات په بریالیتوب روان دي او دا سیمې اوس د طالبانو له شتون څخه پاکې شوي دي.
هغه وایی، دې ولسوالیو کې به د بشپړ امنيت رامنځ ته کېدو وروسته حکومت او مرستندويه ادارې بېلابېلو برخو کې پروژې پلي کړي او خلکو ته به په ګڼ شمېر برخو کې خدمات وړاندې کړي.
بل لورته د يادو ولسواليو خلک هم غوښتنه کوي، ترڅو د عملياتو پای ته رسيدو وروسته ورته په ګڼ شمېر برخو کې پروژې تطبيق شي.
دا په داسې حال کې ده چې د ننګرهار ولایت خوګیاڼو، شیرزادو او دغه راز ځینو نورو ولسوالیو کې د طالبانو د خوځښتونو راپورونه ورکول کیږي خو ولایتي چارواکو یې پر وړاندې عملیات پیل کړي او د سیمو د پاکېدو خبر یې ورکوي.