تاند ( سې شنبه، د کب ۵) د افغانستان د سیمه اییزو ارګانونو خپلواکه اداره په کندهار ولایت کې د ټولو ۱۷ ولسوالیو لپاره د نوي ولسوالانو د ګمارل کېدو خبر ورکوي.
دا نوي ولسوالان ټول په یوه ورځ پرون ( دوشنبه، د کب ۴) د کندهار د والي روح الله خانزاده له خوا د یوې غونډې په ترڅ کې دندو ته معرفي شوي دي.
په داسې حال کې چې په تېرو نژدې دوو لسیزو کې د کندهار د ډېری ولسوالیو ولسوالان نه وو بدل شوي او یا هم په لږ توپیر له یوې ولسوالۍ څخه بلې ته بدل شوي وو.
د کندهار والي د نويو ولسوالانو د پېژندنې په مراسمو کې ویلي چې نوي ولسوالان باید د ټاکل کېدو سره سم خپلو ولسوالیو ته ولاړ شي .
د خانزاده په وينا، په عینو مېنه کي ولسوالي نه منم او که کوم کس نه غواړي، چې ولاړ شي څوکۍ دې پریږدي.
د ځینو رپوټونو له مخې د کندهار په ګډون د هېواد په سلګونو ولسوالیو کې ولسوالان د مختلفو دلایلو له مخې ولسوالیو ته نه ځي او د ولایتونو له مرکزونو دندې مخ ته بیایي.
کندهار کې هم تر دې وړاندې د ځينو ولسواليو ولسوالان په کندهار ښار يا عينو مېنه کې اوسېدل او خپلو ولسواليو ته نه تلل.
د کندهار نوي ټاکل شوي ولسوالان وایي، د نوي طرازالعمل له مخي ورکړل شوی اجرائیوي واک باید سمبولیک نه بلکي په عمل کې پلی شي.
د یادونې وړ ده چې تر دې وړاندې افغان ولسمشر محمد اشرف غني د یوه حکم پر بنسټ د افغانستان ختیځ ننګرهار پنځلسو ولسوالیو ته هم نوي ولسوالان ګومارلي و.
افغان چارواکي دغه راز وایي، د ښې حکومتولۍ په موخه د نويو ولسوالانو د ګومارنې بهير کې تازه په دندو ګومارل شوي ولسوالان یې د زده کړو، ښې مخينې او نوي فکر لرلو تر څنګ د ځاي خلکو د غوښتني پر بنسټ غوره کړي دي.
دا په داسې حال کې ده چې افغانستان کې لا هم د ولسوالۍ شوراګانې نه دي جوړې شوې، په پام کې وه د دغو شوراګانو ټاکني له تېرو ولسمشریزو ټاکنو سره یو ځای تر سره شوی وای خو د بېلابېلو لاملونو له امله ترسره نه شوې.