تاند (یکشنبه د حوت ۳) ملت ته د حکومت د حساب ورکونې په لړ کې د د افغانستان د زندانونو د تنظیم ادارې مسؤلینو خپل د روان کال راپور له ملت سره شریک کړ.
ددغې ادارې د مسؤلینو په خبره، په زندانونو کې اوس هم ستونزې شته او بندیان مخدره توکي کاروي.
دوی وايي، په ځینو زندانونو کې زندانیان د سلب ازادۍ په ځايونو کې موبایلونه له ځان سره لري او زیاتوي چې د ننه زندانونو کې مخدره توکي کارول کېږي خو په وینا یې د مخنیوي لپاره یې پلان لري.
د مسؤلینو د معلوماتو پر اساس، په تېر یوه کال کې یې د هېواد زندانونو کې د نشه يي توکو په ګډون، د زندانیانو په لاس جوړې جارحه وسیلې، موبایلونه او ګڼ نور هغه شیان نیولي، چې زندان کې یې پر ساتلو بندیز دی.
د زندانونو د تنظيم ادارې نظامي مرستيال نظام الدين نورستانی وايي، «زه دا نه ردوم رښتيا هم د ننه کېږي، خو مونږ يې بايد په وړاندې اقدام وکړو چې د چا له لوري داخلېږي لومړۍ کار به زمونږ دا وي چې کراول بايد معياري شي او قوي شي.»
د مسؤلینو په وینا چې د بندیانو د وضعیت د ښه والي په خاطر یې پلانونه په پام کې نیولي او په اصلاحاتو یې کار روان کړی دی.
د زندانونو د تنظیم اداره وايي، په ټولو زندانونو کې یې د بندیانو د زدکړې او تحصیلي درجې کچې تثبیت کړي دي او په پام کې لري چې بندیانو ته د ښوونې او روزنې پروګرام پیل کړي.
ددې ادارې د معلوماتو له مخې، د هېواد په ټولو زندانونو کې ۲۹۲۴۸ تنه بندیان دي، چې ۱۶۴۴۶ کسان پکې نارینه دي او د ټولو بهرنیو بندیانو شمېر ۱۹۹ تنه دی.
دغه اداره وايي، له دوی سره زندانونو کې د داعش ډلې ۴۹۷ کسان بندیان دي، خو د القاعدې شبکې هېڅ بندي نه لري.
د زندانونو د تنظیم ادارې مسؤلین همدا راز وايي، چې د بګرام د زندان په شمول ځینې نور زندانونه هم د دوی په اختیار کې نه دي او د نورو امنیتي او کشفي ادارو له لوري اداره کیږي چې دوی هڅه کوي، څو د دغو زندانونو مسؤلیت په خپل لاس کې واخلي.