تاند (یکشنبه د حوت ۳) د ولسمشر اشرف غني د وياند مرستيال دواخان مينه پال وايي، صرافانو نن ماښام له ولسمشر سره ولیدل او کاري اعتصاب یې پای ته ورساوه.
ښاغلي مینه پال یکشنبه ماخوستن مهال پر خپل ټویټر لیکلي، « صرافانو دولسمشر سره په نن ماښام ناسته کي کاري اعتصاب ختم کړ، حکومت به دیوې اوونۍ په دننه کي دصرافانو ستونزي حل کړي.»
نوموړي په داسې مهال د صرافانو د کاري اعتصاب د پای ته رسېدو خبر ورکړی چې له تېرو شاوخوا درې اونیو راپدېخوا په ټول افغانستان کې د صرافۍ مارکېټونه تړل شوي و.
تر دې مخکې د صرافانو ټولنې د خپل اعتصاب د درېیمې اونۍ په لړ کې له افغانستان بانک غوښتي و چې د صرافانو ستونزو د حل لپاره خبرو ته ورسره تیار شي او په وينا يې که دا حالت دوام وکړي، خلک به تر لا ډېر فشار لاندې راشي.
د صرافانو ټولنه وايي، له تېرو دوو اونیو راهیسې چې صرافیانې تړل شوي، خلک له ګڼو ستونزو سره مخامخ شوي او پر بازار یې هم اغیز کړی دی.
د صرافانو په وینا، دوی وروسته له هغه کاري اعتصاب پیل کړ چې د افغانستان بانک د صرافانو له وړاندیزونو او نظرونو پرته د دوی جوازونه لغوه کړل.