تاند (شنبه د دلوې ۱۸) د افغانستان صرافانو ټولنې په پلازمېنه کابل او نورو ولایتونو کې د اعتراض په ډول د صرافۍ مارکېټونه تړلي دي.
د صرافانو او پولي خدمتونو ټولنې د یوې خبرپاڼې په خپرولو سره ویلي، د پولي خدماتو یاد مارکېټونه به تر هغه تړلي وي چې د دوی ستونزو ته رسېدنه نه وي شوي.
په خبرپاڼه کې راغلي، د افغانستان بانک دې د پخوا په شان انفرادي صرافیو او پولي خدمتونو ته جوازونه توزیع او تمدید کړي او د دوی فعالیتونه دې د صرافانو مقررې سره سم قانوني کړي.
بله خوا بیا د افغانستان بانک په یوه بیان کې ویلي چې ټولې صرافۍ باید د انفرادي جواز پر ځای شرکتي جواز تر لاسه کړي.
د صرافانو ملي ټولنه وايي، د صرافانو له وړاندیزونو او نظرونو پرته د افغانستان بانک د دوی جوازونه لغوه کړي دي او زیاته کړې یې ده چې د صرافیو شرکتي جوازونه باید اختیاري وي.
یادې ټولنې همدارنګه زیاته کړې چې مخکې د صرافیو او پولي خدماتو انفرادي جوازونه د درې کلونو لپاره تمدېدل، خو اوس وايي چې د افغانستان بانک دغه پروسه لغوه کړې چې په وینا یې دوی ته یې ګڼې ستونزې پیدا کړي دي.
خو د افغانستان بانک بیا د صرافانو اعتراض ته په غبرګون کې ویلي چې له انفرادي څخه شرکتي جواز ته پرېکړه له نړیوالو شریکانو سره په شریکه شوې ده.
د افغانستان بانک د نشراتي څانګې لوی مسؤل حسیب الله نوري رسنیو ته په یو استول شوي وېډیوي پیغام کې ویلي چې یاده پروسه کولای شي د ترهګرۍ د تمویل او پیسو وینځلو پر وړاندې اغېزمنه تمامه شي.
د افغانستان بانک زیاته کړې، چې د شرکتي جواز د تر لاسه کولو په بهیر کې نسبت انفرادي جواز ته ګڼې اسانتیاوي رامنځته کړي دي.
« تاسو د شرکتي جواز په ترلاسه کولو سره یوازی ثابته مالیه ورکوی، شرکتی جواز د کلنی بیلانس وړاندې کولو ته اړتیا نه لري، شرکتی جواز اوس څو نفری د نظار پلاوي ته اړتیا نلري، یوازی مالک د جواز کولی شی د نظار پلاوي و اووسی، شرکتي جواز د اعتبار د ختمیدو نېټې پرته ورکول کیږي، د شرکتي جواز په اخیستلو سره کولای شئ د هېواد په هر ګوټ کې نماینده ګي پرانیزئ، هغه کسان چې شرکتي جوازونه اخلي د سر تضمین او لوړو زده کړو ته اړتیا نلري.»
د افغانستان بانک د معلوماتو له مخې، شرکتي جواز د اعتبار د ختمیدو نېټې پرته ورکول کیږي او زیاتوي چې صرافان د یاد جواز په تر لاسه کولو سره کولای شي د هیواد په هر ګوټ کې نمایندګي خلاصه کړي.