تاند (جمعه د حوت ۱) د ناټو سرمنشي ینس سټولټنبرګ له ولسمشر اشرف غني سره د ناټو د دفاع وزیرانو تر غونډې وروسته ټیلیفوني خبرې کړي.
سټولټنبرګ نن جمعه پر خپل ټویټر لیکلي چې ناټو د ترهګرۍ خلاف جګړه کې د افغان امنیتي او دفاعي ځواکونو د ملاتړ دوام ته ژمنه ده.
نوموړي په ټولو لوریو غږ کړی چې د سولې خبرو د تقویت او د سیاسي حل لپاره خپلې هڅې زیاتې کړې.
Good to speak with President @ashrafghani of #Afghanistan. #NATO remains committed to our mission & supporting the Afghan security forces in their fight against terrorism. All sides must engage in re-energising the peace process to find a lasting solution.
— Jens Stoltenberg (@jensstoltenberg) February 19, 2021
تر دې مخکې د ولسمشر د ویاند مرستیال دواخان مینه پال هم پر خپل ټویټر لیکلي و چې افغان حکومت د ناټو د دې پرېکړې هرکلی کوي چې د افغانستان د امنیتي او دفاعي ځواکونو روزنې، تجهیز او سلا مشورو ته به دوام ورکوي او د ځواکونو په وتلو کي بېړه نه کوي.
خو ښاغلي مینه پال د ولسمشر غني او ینس سټولټبرګ د ټلیفوني خبرو په هکله معلومات نه دي ورکړي.
د ناټو د دفاع وزیرانو غونډه د چهارشنبې او پنجشنبې (۲۹ او ۳۰) په ورځو کې په آنلاین ډول تر سره شوه.
که څه هم په دې ناسته کې په افغانستان کې د ناټو ځواکونو د راتلونکي حضور په هکله پرېکړه ونه شوه، خو ناټو د بیا ځل لپاره ژمنه وکړه چې د افغان امنیتي او دفاعي ځواکونو روزنې، تجهیز او سلا مشورو ته دوام ورکوي.
ینس سټولټنبرګ په دې ناسته کې وویل چې اوس هم یوې سیاسي هوکړې ته د رسېدو لپاره فرصت شته او ښکیل لوري باید له دې فرصت څخه ګټه پورته کړي.