تاند ( چهارشنبه، د دلوې ۲۹) پاکستان غواړي چې له افغانستان کې هوایي اړیکې لا زیاتې او پياوړې کړي.
پاکستاني لوري د افغانستان له هوايي چلند چارواکو غوښتي چې د افغانستان او پاکستان ترمنځ دې هوايي پروازونه زیات شي.
د (پي ای اې) شرکت مشر ارشاد ملک د افغانستان هوايي چلند چارواکو سره د لیدنې پر مهال غوښتي چې کندهار او مزار شریف ښارونو ته د پې ای اې شرکت هوايي الوتنو او د (توکو) لېږد کې زیاتوالی راشي.
پاکستان داسې مهال د هوایي اړیکو د پياوړتیا غوښتنه کوي چې یاد هېواد وخت ناوخته د سیاسي ناندریو پرمهال له سوداګریز فشار نه کار اخلي او لارې تړي.
افغان سوداګر وایي ډېر کله پاکستان ورته د سوداګریزو توکو په لېږد رالېږد کې ستونزې جوړوي او له همدې امله دوی ته هم مالي زیانونه اوړي.
دوی هیله لري چې،پاکستان دې له سوداګرۍ نه د سیاسي فشار په توګه کار نه اخلي او نه دې هم دواړه لوریو سوداګرو ته زیان اړوي.
بل لورته د افغانستان د هوايي چلند چارواکو تر اوسه د پاکستان د دې غوښتنې په غبرګون کې واضح څه نه دي ویلي.
پاکستان یو نا مطمئن شریک او سیال دی، هغه په خپلو ژمنو هېڅکله عمل نه کوي .
یواځې د کابل او اسلام آباد یا راولپنډۍ ترمنځ د دواړو هېوادونو د پروازونو تفاهم د اوس لپاره کفایت کوي .