تاند (چهارشبنه د دلوې ۲۹) د پاکستاني طالبانو پخواني ویاند احسان الله احسان د نجونو د زدکړو پښتنې فعالې ملالې یوسفزۍ او د هغې پلار ته د وژلو ګواښ کړی دی.
احسان الله احسان وروسته له هغه ملالې ته د وژلو ګواښ وکړ چې هغې تازه په خپلو خبرو کې ویلي چې سوات یې لومړی او د بریتانیا برمنګهم ښار ورته د دویم کور حیثیت لري.
احسان د ملالې دې خبرو ته په ځواب پر خپل ټوېټر لیکلي: « ته ژر خپل لومړي کور ته راشه. تا او ستا پلار سره ډېر حساب پاتې دی. تا پسې چې کوم پور دی هغه باید درنه واخیستل شي. دا ځل به د حساب لپاره یو ماهر کس در واستول شي چې هېڅ شک په کې پاتې نشي.»
ملالې یوسفزۍ د احسان الله احسان خبرو ته په کتو پر خپله رسمي ټویټر پاڼه د پاکستان له صدراعظم عمران خان او ددغه هیواد د پوځ له ویاند څخه پوښتنه کړې، چې نوموړی د دوی له بنده څنګه خلاص شوی؟
This is the ex-spokesperson of Tehrik-i-Taliban Pakistan who claims responsibility for the attack on me and many innocent people. He is now threatening people on social media. How did he escape @OfficialDGISPR @ImranKhanPTI? https://t.co/1RDdZaxprs
— Malala (@Malala) February 16, 2021
تر اوسه پاکستاني چارواکو د مېرمن یوسفزۍ ددې څرګندونو په غبرګون کې څه نه دي ویلي.
ملالې پر خپل ټویټر دا هم لیکلي چې احسان الله احسان ددې په ګډون په ګڼو کسانو د بریدونو مسؤلیت منلی او اوس پر خواله رسنیو خلکو ته اخطارونه ورکوي.
د پاکستاني طالبانو پخوانی ویاند احسان الله احسان د تېر کال په فېبرورۍ میاشت کې ویلي و چې دی او کورنۍ يې د پاکستاني استخباراتو له زندانه خلاص شوي او له خپلې کورنۍ سره په یوه خوندي ځای کې ژوند کوي.
تر دې مخکې د یاد هېواد پوځ په ۲۰۱۷ کال کې ویلي و چې نوموړی ورته تسلیم شوی دی.
که څه هم پاکستاني چارواکو او پوځ لومړی د دوی له بنده د احسان الله احسان د تېښتې په هکله څه نه ویل، خو وروسته بیا د کورنیو چارو وزیر اعجاز شاه له رسنیو سره په خبرو کې ومنله چې احسان د دوی له بنده تښتېدلی او په هکله یې پلټنې پیل شوي دي.
د یادونې وړ ده چې پر ملالې یوسفزۍ شاوخوا ۱۲ کاله مخکې د ۲۰۱۲ کال د اکتوبر په ۹مه په سوات کې هغه مهال وسله وال برید وشو چې نوموړې له ښوونځي بېرته د خپل کور په لور روانه وه.
ددې برید مسؤلیت هغه وخت د پاکستاني طالبانو ویاند احسان الله احسان منلی و.
ملاله یوسفزۍ په هغه برید کې تر ټپي کېدو وروسته د درملنې لپاره برېتانیا ته ولېږدول شوه او له همغه وخته راپدېخوا په برېتانیا کې ژوند کوي.
د سولې د نوبل جایزې ګټونکې، ملاله یوسفزۍ تېر کال د بریتانیا له مشهور اکسفورډ پوهنتونه څخه فارغ شوه.