تاند (دوشنبه د دلوې ۲۷) د هرات والي وایي دوی بریالي شوي چې شاوخوا ۸۵ سلنه وسایط د اسلام کلا ګمرک کې له اور وژغوري.
د هرات ولایت مقام څخه په خپره شوې خبرپاڼه کې راغلي چې والي عبدالوحید قتالي دغه څرګندونې نن په یوه خبري کنفرانس کې وکړې.
د ښاغلي قتالي په خبره چې تر ۳۰۰ پورې موټرونه د اسلام کلا په ګمرک کې د اورلګېدنې له امله سوځېدلي چې میلیونونه ډالر زیان یې اړولی دی.
د نوموړي د معلوماتو له مخې، سره له دې دوی بریالي شوي چې شاوخوا ۸۵ سلنه موټر چې شمېر یې تر ۲ زره اوړي د اور له لمبو وژغورلی شوی.
په خبرپاڼه کې دغه دار د هرات د والي له قوله راغلي چې د هرات ولایت ټول تخنیکي او کشفي ټیمونه په سیمه کې دي او په هر اړخیزه توګه به دغه پېښه څېړي.
عبدالوحید قتالي وايي تر اوسه نه ده معلومه چې د پېښې اصلي لامل څه دی خو وخت پر وخت به د خپلو پلټنو معلومات له رسنیو سره شریک کړي.
نوموړي د یران له همکاریو هم مننه وکړه چې د اور په مهارولو کې یې له افغان حکومت سره مرسته وکړه او په دې توګه یې د لا ډېرو زیانونو مخنیوی وکړ.
د والي عبدالوحید په وینا د ګمرک چارې به ډېرې ژر پيل شي او په خبره یې هېچا ته به اجازه ور نه کړي چې له رامنځ ته شوی وضعیت ناسمه ګټه پورته کړي او یا د سوداګرو توکي او مالونه لوټ کړي.
بله خوا د یادې اورلګېدنې له امله یو شمېر زیانمن شویو سوداګرو له رسنیو سره په خبره کې ویلي چې دوی ته د دولت د څو تنو فاسدو مامورینو له لاسه په میلیونونه ډالرو زیان ور اوښتی دی.
د سوداګرو په خبره چې د اسلام کلا ګمرک مامورینو یې موټرونه په غیر قانوني توګه د یو څو روپو رشوت لپاره را ایسار کړي و.
سوداګرو د دغې اورلګېدنې او دوی ته د وراوښتي تاوان مسؤل دولت بللی او پر حکومت یې غږ کړی، چې باید د رامنځته شوې اور لګېدنې او ور اوښتي تاوان پور ورکړي.