تاند (یک شنبه، د دلوې ۲۶) سویلي افریقا په دویمه نړیواله شل اوره لوبه کې پاکستان ته ماتې ورکړه.
افریقا لوبډلې دا لوبه د ۶ ویکټو په توپیر له پاکستان نه وګټله.
دا لوبه چې په لاهور کې ترسره شوه، سویلي افریقا د لوبې پچه وګټله او پاکستان ته يې د توپوهنې بلنه ورکړه.
پاکستان په ټاکلو ۲۰ اورونو کې د ۷ لوبغاړو په سوځېدو ۱۴۴ منډې وکړې او سویلي افریقا لوبډلې ته یې ۱۴۵ منډو هدف ورکړ.
د سویلي افریقا له لوري ډواین پریټوریس ۵ پاکستاني لوبغاړي وسوځول.
سویلي افریقا لوبډلې په ۱۷ ام اور کې د ۴ لوبغاړو په سوځېدو ټاکل شوی هدف پوره کړ او د ۶ ویکټو په توپیر يې لوبه وګټله.
د پاکستان له لوري شاهین شاه اپريدي ۲ لوبغاړي وسوځول.
د لوبې غوره لوبغاړی ډواین پریټوریس وټاکل شو.
د یادونې ده چې له دې وړاندې لومړۍ لوبه کې پاکستان بریا خپله کړې وه او وروستۍ او درېیمه شل اوره لوبه به د فبرورۍ په ۱۴مه نېټه ترسره شي.